Jetzt als Podcast anhören:
Foto: Hans-Peter Schwöbel
Friehling! Gott sei Donk! Blumme un Bääm, Viehscha un Mensche atme uff un schigge ihr Farwe, ihrn Duft, ihr Lieda, ihr Gebeede un ihr Gedischte in de Himmel. Om Winda isses s’Schänschde die Freed uff de Friehling. Jedenfalls in de Kurpalz.
Schiefahre is nädd viel, außer ma hädd morgens die Rhoi-Ewene on de Bergstrooß hochkoowe un noch Weste gekippt. Donn hädde die Leit mit Schie un Schlidde longsom vun Woinem, Schriese, Hellese, Heidelbärg, Ladebeirg, Monnem un Ludwigshafe on die Woischdrooß fahre känne. Un Oowends hädd ma grad umgekehrt die Rhoi-Ewene noch Oste kibbe misse, un die Leit hädde mit ä paar Schobbe im Kobb vun Däärkm, Naistadt, Ungschdää, Fränsm un Frdlsm (Friedelsheim, die änzisch Gemoinde in Daitschlond, wo bloß die Konsonande gschbroche wärre!) widda hääm fahre känne. Wonn’s Schnee gewwwe hädd. Wer in de Rhoi-Ewene Schnee sehe will, muss des Wort schwarz uff weiß hieschreiwe: Schnee.
Wer kä Schie un kän Schlitte hott, hätt wenigschnds glänne känne. Wonn’s Eis gewwe hädd. Känne Se des Wort ‚glänne’ noch? Des heeßt, mit normale Schuh uff ännare gfrorene Pitz (Pfütze) odda me gfrorene See rutsche, so weit ma konn. So: Oolaaf nemme - un glänne. Frieher hawwe Buuwe im Winda jemond, wo se ägern wollde, nachts als ä Glänn vor die Hausdier gepinkelt un om näggschde Daach druff gebasst, ob der vor soim eigene Haus uff die Gosch fällt. Monschmol hodd’s geklappt...
Wonn’s warm wärrd, setze „Krötenwanderungen“ oi. Gott sei Donk gibt’s Froschfreunde, wo dänne goldische Diersche (Tierchen) iwwa die Schdrooß helfe, dasse vun de Audos nädd zu Matsch gfahre wärre. Gott sei Donk! Amphibie sin nitzlisch. Sie fresse Steschmiggelarve, dass uns im Summa die Schnooge nädd so plooge. Allää dodefier misst ma de Krodde än Orde (s’Bundesvadienschtkreiz odda de Bloomaul-Orde) um de Hals hänge, wonn se änna hädde – än Hals.
Außerdäm is ä Krodd ä schäänes Dier. Des hodd unsan rhoihessischa Bruda, de Carl Zuckmayer, schun in soim Schdick „Katharina Knie“ gsacht: „Un s‘allaschännschde Diersche uff de Welt, des is un bleibt die Krodd, weil se kä Gebimsl-Gebamsl hinne hänge hodd.“ Jetz vaschdehe ma aa bessa, warum des bei uns so ää schääni Lieweserklärung fär ä Meedsche is: Du bisch ä goldischi Krott!
Zum Schluss noch ä Friehlingsgedischt vun mir, dass aa bei dänne, wo unsa Muddaschbrooch noch nädd so guud känne, de Friehling Oizug halde konn:
Geburt des Regenbogens
An den streng geschlossenen
Knospen der Wildkirsche
hängen kristallklare
Regenglöckchen
Behutsam klingen
die Strahlen
der Frühlingssonne
an ihr zerbrechliches Glas
und entlocken ihm
die zarten Farbtöne
des Regenbogens
Der Schwöbel-BLOG am Samstag, 18.03.2023
