Bääm maschiere vun de Berge
in die Ewene om Rhoi,
wärre Mensche, wärre Zwerge
wärre sunnedroggena Woi.
S’Rieserad drehd sisch noch unne
un noch owwe uff de onna Seit,
moi Konzl schdeigd jetz, unn isch seh drunne
die gonz Worschtmarkt-Herrlischkeid.
De Worschtmarkt iss nädd fä die foine Gfiehle,
zwische Dir un mir un Eisch un uns,
Orgie sin des - raue Schbiele,
fär Disch un misch, fär Hinz und Kunz.
Gonze Schubkärsch brille Lieda,
schunkle sisch die Bagge wund,
un sie schwewe uff un nieder,
uffm Worschtmarkt, geht’s jetz rund.
On de Dreggääma schdehn se beinonna,
drigge sisch die Brotwärscht noi,
un die erschde gehe unna,
noch’m sechste Schobbe Woi.
Alles gehd jetz durschännonna:
ä Kind isst Zuggawatt mit Blunz,
än foina Herr, der iwwagibt sisch,
newedro lacht so ä Schlunz.
Um Disch doobts in alle Zelde,
der Druuwl macht äm noch gonz wärr,
Germone, Hunne, Räma, Kelde,
der Durschänonna macht Disch ärr.
Gsischda siesch, die sin schun klasse,
rabbldärr un kugglrund,
Gosche, wo’n Schobbe fasse,
monscha ähnelt arg soim Hund.
Sogar Elwetritsche schdaune,
dass ma so schää ausseh konn,
wonn se dursch die Dämmrung raune,
unnawegs uff Menschefong.
Zwische ihre schdarge Kralle,
schlebbe se än große Sack,
un sie fonge, die wo lalle,
monschmol aa im Sechser-Pack.
Un donn duun sä sä vaschdegge,
rund um Däärgm on de Haardt,
duun se neggschd Johr widda wegge
zurä naia Worschtmarkt-Heldedad.
S’Rieserad dreht sisch noch owwe
un noch unne uff de onna Seit,
moi Konzl sinkt jetz, un isch bin drunne
in de Worschtmarkt-Herrlischkeid.
Vun de Haardt schwämmt Lischt in Welle,
Oowendfaawe in moi Gsischt,
un im Wingert wachse Quelle
fär moi näckschdi Worschtmarkt-Gschischt.
Bääm maschiere vun de Berge
in die Ewene om Rhoi,
wärre Mensche, wärre Zwärge,
wärre sunnedroggena Woi.
Hans-Peter Schwöbel: LICHT ERNTEN. Satire und Poesie. Mannheimer Mundart und Hochdeutsch. Seite 19 ff. verlag regionalkultur. ISBN 987-3-89735-754-9
