Un des Klo funktioniert nädd. Also nädd, dass ma nädd druff hogge kännt un soi großes un kläänes Gschäft mache. Des deed schun laafe, saache die, wo’s probiert hawwe. Aa än Redakdeur vun de Provinz-... ääh... Regionalzeidung, „Monnem jetz wärrds Daach“, hodd uff dem Klo än Selbschtvasuch unnanummä. Wisse Se, wie frieha die große Dokda, wo sisch selwa was abgsägt hawwe, um ä bschdimmdi Amputationsteschnik zu entwickle, odda was gschluckt hawwe, un nädd gewisst, ob se morge frieh widda uffwache. Jedenfalls, der Redakdeur hodd alles mache känne, was än guud genährda un gedrunkena Kurpälza mit Genuss uffm Klo mache konn un muss. Bloß die Klodier hodda nädd zumache känne. Wie’s in dem Schbruch heeßt: Do griggsch die Dier nädd zu!
Isch vaschdeh die Seggema nädd. Die hawwe in ihrm Hoimat-Museum ä Holz-Häisl schdehe mimä Herzl als Fenschda in de Dier un ämme gemietlische Dunnabalge (Plumpsklo). Der Duannbalge is nädd so modern, wie des Kiosk-Klo uff de Planke. Awwa: er funktioniert! Die Seggema misse vaschdehe, dass ihr Museum nädd bloß fär die Erinnerung un Kontemplation guud is, sondern aa als Ersatzteillager herhalde konn. Stellt den Dunnabalge uff die Planke, un ihr wärrd Tourischde aus aller Welt ooziehe.
Uff de onna Seid muss isch grad on die Kommune I in Berlin denke (1967 - 1969). Die hawwe die Klodier ausghängt, weil se gemäänt hawwe, wer die Klodier hinna sisch zumacht, is än Schbießa un Faschist: Die Klääfamilie wär die Worzel vum Faschismus, weil nädd alles uuscheniert un effentlisch bassiert. Do saach isch: Nachtigall, isch heer Disch huschde! Grad alleweil lewe ma widda in Zeide, wo Leit, so ähnlisch, wie domols die Wohlstandsverwahrloste in de Kommune I, onnare Leit Reschtspopulisde, Faschisde, Rassisde un Nazis heeße, weil die große un ernschde Probläme, onnascht sehe, begreife un beurdeile wie sie selwa. Des zum „Tag der Deutschen Einheit“...
Mia schdelle fescht: Fär alle Probläme gibt’s Leesunge. Entweda teschnische. Do schdelle die Seggema ihrn Dunnabalge ausm Hoimatmuseum uff die Planke. Odda kuldurevolutionäre. Do bleibt die Klodier ääfach uff un jeda sieht, do hoggt jetz jemond druff. Un ma konn sisch aa guud mit dem unnahalde, wo do grad driggt. Om Beschde alles zwee: Dunnabalge mit Herz un offenes Klo als Beweis für die Offene Gesellschaft. Do kännde gonz naie Formade vun Talk-Shows entschdehe. Statt „Gespräche am Kamin“ – „Philosophie am offenen Abort“ odda „Tiefen-Talk iwwam Dunnabalge“.
WOCHENBLATT Mannheim
05. Oktober 2018
